ქობულეთში მუნიციპალური ტრანსპორტის ნაწილმა მუშაობა განაახლა

ქობულეთში მუნიციპალური ტრანსპორტის ნაწილმა მუშაობა განაახლა. ქობულეთის ტრანსრეგულირების სამსახურის ინფორმაციით, ამ დროისთვის ავტობუსები მხოლოდ ქალაქის ტერიტორიაზე მოძრაობენ.

მათივე განმარტებით, ამჟამად ოთხი ავტობუსი დ. აღმაშენებლის და შ. რუსთაველის ქუჩებზე 19:00 საათამდე იმოძრავებენ.

რაც შეეხება სოფლებს, ავტობუსები ამ მიმართულებით, ეტაპობრივად, მეტეოროლოგიური ვითარების გამოსწორების შესაბამისად აღდგება.

შეგახსენებთ, რამდენიმე დღის წინ, უხვი ნალექის და დიდთოვლობის გამო მუნიციპალურმა ტრანსპორტმა მოძრაობა შეაჩერა.